كفتة الدجاج المحشية بالمشروم والجبن

كفتة الدجاج المحشية بالمشروم والجبن من مطبخ غادة عاطف .. وصفة سهلة وطعمها لذيذ يمكنك تقديمها على الغداء أو العشاء.

المقادير: 
- 4 صدور دجاج. 

- ملعقة صغيرة زعتر. 

- ملعقة صغيرة كزبرة. 

- ملعقة صغيرة حبهان مطحون.
 
- ثمرة بطاطس متوسّطة. 

- ملح وفلفل أسود. 

للحشو: 
- 10 مكعبات جبنة كريمي (ممكن تستخدمي جبنة نستو أو شيدر). 

- 2 ملعقة كبيرة بقدونس مفروم. 

- ½ كوب مشروم مفروم. 

للتغطية: 
- 2 بيضة. 

- 2 كوب بقسماط ناعم. 

- ½ ملعقة صغيرة ملح. 

- رشة فلفل أسود. 

- زيت للقلي. 

طريقة التحضير: 
- اسلقي البطاطس نصف سوى وقطعيها شرائح وسيبيها لحد ما تبرد تماما.

- افرمي صدور الدجاج وشرائح البطاطس مع بعض في المفرمة وبعد كده تبّليها بالملح والفلفل والكزبرة والزعتر والحبهان واعجني الخليط كله بإيدك كويس.

الحشو:
- اخلطي المشروم مع الجبنة والبقدونس وقلبيهم مع بعض كويس.

- خدي كمية مناسبة من الكفتة وافرديها على إيدك واحشيها بكمية مناسبة من الحشو ولفيها على شكل صوابع وكرري الخطوة حتي تنتهي من الكمية.

- اخفقي البيض في طبق وحطي عليه الملح والفلفل وحطي أصابع الكفتة في البيض وبعد كده في البقسماط.

- حمري الكفتة في زيت ساخن وغزير وبعد كده طلعيها على مناديل ورقية علشان تتشرب الزيت وعند التقديم زينيها بالبقدونس وبالهنا والشفا.