بالفيديو .. تفاصيل أزمة حمو بيكا مع عمر كمال
10:30 ص - الخميس 17 ديسمبر 2020
بيكا وعمر كمال
شهدت الساعات الماضية، حدوث خلاف كبير بين مطربي المهرجانات حمو بيكا، وعمر كمال، على موقع التواصل الاجتماعي ، ليتصدر بعدها حمو بيكا موقع التدوينات القصيرة «تويتر».
ربما يعجبك
بدأت القصة بنشر حمو بيكا صورة لعمر كمال مصاحبة لعلامة «إكس» على وجهه، وعلق عليها: «ياريت محدش يكلمني في شغل على الشخصية دي، عشان أنا كنت بحبها، والشخصية دى بتتهرب من شغلي اللي خلاني اتفق عليه، والإثبات بعد الصورة دى هنزل فيديو»، مضيفا: «هو عامل بيحبني وهو بيكرهني، مع السلامة يا صحاب مزيفة».
ولم يكتفي «بيكا» بذلك، وظهر بعدها بأقل من ساعة في بث مباشر، وقال: «من سنتين مكنتش أعرف عمر كمال ولا أعرف مين ده، وجاب رقمي وبعتلي أنا عمر كمال اللي عمل أغنية الغربة وقالي وقتها أنا محتاج أعمل معاك أغنية، قولتله ده مكانك ومكان أخوك وتنزل تشرف أي وقت، وعشان أنا أبيض وبحب الخير لكل الناس فتحتله دراعي وعملتله أول أغنية كلكم عارفينها اسمها مساء النقص الأغنية نجحت ساعتها».
وأضاف: «كلمني بعدها بفترة، وقالي نعمل أغنية تانية قولتله تيجي دي مكانك ووافقت عملنا وقتها شمس المجرة بدأت من هنا مهرجانات كتيرة بتجمعنا، ومن فترة كنا بنسجل مهرجان انتي معلمة وهو عمل الفيديو وكان مسؤول عن كل حاجة وعمل كل حاجة لأن التراك ده كان هينزل على قناته بتاعت اليوتيوب وهيكسب منه وأنا عشان قلبي أبيض وكنت بعتبره طيب وغلبان لكن هو مطلعش طيب ولا غلبان».
وتابع «بيكا»، في البث المباشر: «بعد ما عملتله أغنيته كنا قاعدين وإسلام ساسو موزع المهرجانات يشهد بالكلام ده كنا قاعدين وكلمت عمر وقولتله فيه تراك اسمه فستان الفرح والناس عايزيني أنا وأنت اتفق ولا لأ، رد عليا قالي اتفق خدت العربون بناءا على ذلك وكلمته تاني يوم كلمته قالي أنا مش فاضي وبدأت أكلمه كتير وكل ما أوصله يقولي مش فاضي وبدأ يتهرب مني وميردش عليا وأنا في الآخر رجعت للناس فلوسها وخليت شكلي مش كويس لأنك أناني بتحب نفسك والناس قالتلي أنت ملكش ذنب أنا بس حابب أقولك حاجة اللي دايم في الدنيا دي هو الصحوبية».
واستكمل: «أنت بقى عمال تلم فلوس وتجمع في فلوس وده اللي همك، وأنا هقفل كل التراكات اللي صوتي طالع معاك فيها لأن ده حقي وهتواصل مع الشركة لأنك بني ادم مش كويس».
واختتم البث المباشر بتوجيه رسالة له هو وحسن شاكوش الذي هاجمه منذ فترة عبر بث مباشر أيضا، وقال: «أنا مبقاش ورايا غيركم انتوا الاتنين العجوز والقصير ربنا يكفيكم شر الغلبان لما هيطلع لأن انتوا مش جاية معاكم بالمحبة ولا بالطيبة وأنا زي ما صغرت مع الناس هصغركم انتوا الاتنين».
وفي بث مباشر عبر صفحته الرسمية على موقع التواصل الاجتماعي «فيس بوك»، رد مطرب المهرجانت، عمر كمال، على هجوم حمو بيكا، وقال: «أنا تحملت كثير جدا إهانات بعض الناس، لكن أنا ممكن أطلع أقولك يا (أبوكرش) لكن كل دي إهانات أنا ماليش فيها».
وأضاف «كمال»: «أنا أول أغنية أتربح من خلالها كانت من خلال أغنية (انتي معلمة)، وكل الأغاني اللي قبل كده كنت بديها لحمو بيكا، عشان يرفعها من خلال قناته ويكسب منها بما فيهم أغاني كانت من إنتاجي أنا، والله مكنتش باخد فلوسهم لأني بكسب من زمان وسيبتك تاكل عيش».
تابع: «الشخص اللي بيتكلم عليا ده، أول ما بينزل من إسكندرية بيجي على شقتي وواكلين عيش وملح مع بعض، اللي حصل إن وأنا قاعد عند الحلاق بتاعي ومعايا حمو فوجئت إنه جايب شخص بتاع فساتين وعايزنا نعمله إعلان من غير ما ياخد إذني، وأنا اتحرجت أرفض قدام الراجل، بس أنا مش عايز اعمل مهرجان لفستان فرح، أنا عايز اعمل فن كويس زي بنت الجيران وعود البطل وكل مهرجاناتي، وحتى بعد الاتفاق مدفعش ليا عربون ولا سألني تاخد كام، على عكس ما بعمل معاه في أي فرح حد بيطلبه فيه، عيب تقول عليا إني صحبة مزيفة، أنا عمري ما كسبت من وراك، أنا سيبتلك ١٢ تراك كلت من وراهم الشهد، حتى العربية بتاعتك أنا اتصدرت أنا ومدير أعمالي عند المعرض عشان يقسطهالك، وضمنتك في مليون و٨٠٠ ألف جنيه، ولو كنت لوحدك مكنش حد هيديك عربية».
وظهر حمو بيكا في لايف ثاني ليرد على عمر كمال، قائلا: «انت كداب وطالع تتمسكن قدام الناس وإسلام ساسو شاهد ولازم يطلع يقول حصل ولا محصلش لأن هو طالع بينكر الكلام ده إزاي كنت اديك فلوس وأنت بتتهرب مني وكل ما باجي أقولك عايزين نعمل التراك ده تقولي بكرة وبعدين بعده وبتتهرب انت عايز تاخد فلوس وخلاص».
وأضاف «بيكا»: «عايز أقولك حاجة لو تعرف تقفل أي مهرجان على اليوتيوب خش اقفله أنا اقفلك قناتك دي كلها أصلا، وبعدين لما أنت عايز متغنيش مهرجانات تاني غنيتها ليه، مش المهرجانات دي هي اللي علتك».
وتابع: «أنا عايزك بس تعرف تغني من غير حسن شاكوش كده تفرجني نفسك بدل ما أنت عمال تقول بنت الجيران كسرت الدنيا وقفلت الدنيا ما هي قفلت فعلا أنا عايزك يا شاطر تطلع تغني لوحدك طب حسن شاكوش عمل أغاني كتير لنفسه ونجحت أنا عايزك تنزل لوحدك وتفرجني».
واختتم «بيكا» حديثه، قائلا: «يا عمر يا كمال انت شغلتي أنا هعرفك إزاي تشتغلني ومتقولش أنا عايز اخرج نفسي ومخرجش نفسي اها طول حياتك بتغني متعرفتش غير لما غنيت مهرجانات».
بعدها، نشر مطرب المهرجانات، حمو بيكا، فيديو آخر عبر صفحته الرسمية يظهر خلاله مع عمر كمال وشخص آخر وهم يتفقون على مهرجان يدعي مهرجان فستان الفرح الذي حدثت من أجله المشكلة وأنكر عمر كمال الاتفاق عليه ورفضه للقيام بالمهرجان، وقال عمر خلال الفيديو: «إن شاء الله أغنية فستان الفرح تبقي أغنية حلوة جدا وتعجب كل الناس».
وكان منذ يومين، ظهر حمو بيكا، في بث مباشر على حسابه الشخصي على موقع الصور الشهير «انستجرام»، وأعلن غضبه من أحد المطربين الذي تحدث عن أنه يحتل بمفرده قائمة أكثر 5 أغاني بحثا خلال عام 2020، دون ذكر اسمه رغم تواجده في القائمة بأغنيتين.
وقال «بيكا»، في البث المباشر: «لما تطلع تتكلم، تحدد النجاح من اللي عمله معاك، انت مبنتش نفسك بنفسك، وأنت ظاهر أمام الشعب المصري إنك أناني مبتحبش غير نفسك، وحابب إن أنت تصنع النجومية لنفسك وبس، فكك من اللي انت بتعمله وخليك محترم وكويس».
وأضاف: «أخونا عمر كمال لما سمع اللي اتقال قال إحنا نجحنا، لكن اللي أنا شايفه إنك كلك على بعضك غلط، حياتك غلط، دنيتك كلها ماشية غلط في غلط،
عايز تحقق نجاحك انت بس، فرجني يا فهلوي يا حلو واعمل كام تراك لوحدك».
