تفاصيل قصة مصطفى أبو تورتة التى قلبت مواقع السوشيال ميديا
خاص الجمال - طارق علي
أثارت قصة هروب عريس أثناء حفل خطوبته جدلاً واسعاً علي مواقع التواصل الإجتماعي، عقب انفصاله عنها وتركها بإحدى قاعات الأفراح، ورحل بعد أخذه "التورتة".
وانهالت الكوميكسات الساخرة حول قضية مصطفي ونهال، وتفاعل معها الملايين منذ طرح نهال رسالتها علي صفحتها الشخصية وأصحبت تريند البحث على جوجل .
وبدأت القصة عقب قيام فتاة تدعى نهال بنشر قصتها مع خطيبها مصطفى قائله:"أنا كان مقري فتحتي زي ما كله عارف على مصطفى وخطبتي كانت يوم السبت، اللي فات المفروض كان بينا مشاكل زي أي اتنين عاديين مع مامته بقى وخلافات بتحصل أول ما أطلب حاجة وقولت دا عادي بيحصل بس اللي متخيلتش إنه يحصل إنه يسيبني في القاعة لوحدي.. اتفاجئت إنه مش عازم صحابه ولا قرايبه كلهم وحسيت في حاجة غلط حتى مامته وأخته مفيش.. واحدة فيهم جت باركتلي وقولت أمشي اليوم".
وتابعت الفتاة: كل ما أقوله فين الشبكه اللي هنلبسها يقوللي أصل اتكب عليها شربات أصل وقع جاتوه عليها.. طب خليها بعد البوفية وكلام كله غريب كدا لحد ما دخلنا بعد البوفية لقيت أهله كلهم مشيوا.. وقال إيه خالوا تعب! فيقوم أهله كلهم يمشوا وأنا في القاعة لوحدي بدور عليه الاقيه بيصرخ برا ويقول خالي عيان وبيلطم وحاجات غريبة كدا وأنا اقسم بالله ما مستوعبة اللي بيحصل هو في واحد خاله عيان عيلته كلها بتمشي الستات اختفوا بس كانو بيهزروا فوق نسوا العيان".
وأضافت: "والأنيل إننا اكتشفنا إنهم أخدوا التورت معاهم طب مش خالك عيان.. أخدتوا التورت معاكم ملبستنيش شبكة.. وقبل كل دا بأيام جالي البيت وأخد التوينز بتاعت قراية الفاتحة بحجة إنه عايز يلبسني كله مرة واحدة في القاعة وأنا هبلة وافقت مجاش في بالي للحظة واحدة انه هيعمل فيا كدا".
واختتمت الفتاة بقلب موجوع: دلوقتى حبه أقول كل دا عشان ايه؟ كان ممكن ننهي بالمعروف من غير أذى نفسي ليا.. كان ممكن تسترجل وتيجي تقولي يلا نفركش وكنت لغيت الخطوبة.. مش جي وبترقص وتقولي محضرلك مفاجأة.. وفي نيتك تعمل فيا كدا.. حسبي الله ونعم الوكيل".
وانهالت التعليقات علي مواقع السوشيال ميديا غاضبة متعاطفة مع الفتاة.
وقام رواد ومستخدمو التواصل الاجتماعي بنشر كوميكس عن الواقعة وأطلقوا عليه بسخرية اسم "مصطفي أبو تورتة".
