Top

موقع الجمال

شارك

سكووب

جوجل يحتفل بذكرى ميلاد أشهر حموات السينما .. واسرار تكشف لاول مرة!

تاريخ النشر:11-02-2019 / 09:48 AM

المحرر: خاص الجمال - طارق علي

احتفى محرك البحث الأشهر عالمياً "جوجل" بذكرى ميلاد الفنانة القديرة ماري منيب، والتى يحل اليوم الموافق 11 فبراير الذكرى الـ 114 لميلادها.

بدايتها الفنية
مارى منيب ممثله مصريه من اسره سوريه نزحت لمصر و عاشت فى حى شبرا. توفى ابوها و هى عندها 11سنه.

اشتغلت فى ملاهى روض الفرج وبعدين اشتغلت فى المسرح مع فرقة فؤاد الجزايرلى ، وبعدين فرقة على الكسار ، وفرق امين عطا الله وبشاره واكيم و محمد بيومى ، وفى الاخر انضمت لفرقة مسرح رمسيس وفرقة نجيب الريحانى وفضلت فى الفرقه حتى وفاة نجيب الريحانى سنة 1949 ، واتحملت مسئولية الفرقه مع بديع خيرى وعادل خيرى اللى قدمت مسرحية " إلا خمسه " اللى بتعتبر اشهر مسرحياتها وقامت فيها بدور ست من اصل تركى مع عادل خيرى.

أشهر أفلامها
فى السينما المصريه بدإت مارى منيب مشوارها من سنة 1934 فى فيلم " ابن الشعب " وكان فيلم " لصوص لكن ظرفاء " مع احمد مظهر وعادل امام اخر افلامها. وبرغم تنوع ادوارها فى السينما لكن غلب عليها دور الحما القاسيه لكن بطابع كوميدى.

اشتهرت مارى منيب بدور الحما فى السينما ، وكانت اول ممثله كوميديه يتسمى فيلم بدورها كحما زى افلام " حماتى قنبله ذريه " ، و"حماتى ملاك" ، و"الحموات الفاتنات".

واشتهرت بضحكتها المميزه وعبارات زى " كتك نيله " و" انا مدوباهم اتنين " و" يا كسوفى " ، وبعبارة " انتى جايه تشتغلى ايه " فى مسرحية " الا خمسه ".

قدمت مارى منيب افلام كتيره ناجحه كان ابرزها فيلم " العزيمه " للمخرج كمال حسين ، و" سى عمر " مع نجيب الريحانى ، و" ليلى بنت الفقراء " مع ليلى مراد ، و" لعبة الست " مع نجيب الريحانى وتحيه كاريوكا ، و" بابا امين " من اخراج يوسف شاهين ، و" الاسطى حسن " و" حميدو " مع فريد شوقى " ، و" ام رتيبه " ، و" حماتى ملاك " ، و" الناس اللى تحت ".

مارى منيب تزوجت الممثل فوزى منيب وهى جدة المطرب الراحل عامر منيب.