تعرف على أول تعليق من ريهام سعيد على حكم حبسها
كتبت الإعلامية ريهام سعيد عبر حسابها على موقع التواصل الجتماعى "الفيسبوك"، في أول تعليق لها على حكم حبسها عاما ونصف بسبب قضية "فتاة المول"، قائلة: "النهارده بلدي كرمتني، بعد ١٣ سنة بعالج كل الناس وبخدم كل اللي حواليا، بعد ١٢ سنة فتحت مدرسة لذوي الاحتياجات الخاصة وعالجت آلاف الأطفال بفضل الله مانمتش وماكلتش حتي فلوس والله ما أخدت، ضيعت عمري عشان أعمل حاجه للبلد دي.. ضيعت حلم التمثيل اللي تعبت فيه بالجامعة عشان ماسيبش الناس الغلابة".
وأضافت "سعيد": "كنت ماشية عكس التيار عشان أقول الحق.. أخدت النهاردة سنة ونص سجن.. كنت بلف العالم أدور على علاجات جديدة للناس الغلابة وعمري ما قصدت ولا حاولت أشهر بحد.. الإعلام مفهوش حاجة اسمها ستر مع إني ماتكلمتش لحد دلوقتي.. ساعات الحقيقة بتكون فضيحة.. كل الناس اللي بتغلط وتشتم وتشهر بجد نجوم دلوقتي".
وتابعت ريهام سعيد قائلة: "المحامي بيقولي ده أمر من فوق.. فوق فين؟؟؟؟؟.. كنت بقول تحيا مصر ويحيا العدل فين العدل؟.. ريهام سعيد مجرمة أنا المجرمة الوحيدة في مصر.. خسارة يا بلدي خسارة مجهودي خسارة يا مصر".
وقالت أيضا: "فاكرة لما كنت بنزل العريش لوحدي وأروح الإنفاق لواحدي ومن غير تأمين وأقول عشان بلدي.. فاكرة لما رحت القدس أقول للفلسطينيين احنا معاكوا ومصر معاكوا ووقفت أدام الرصاص عادي وأقول عشان بلدي.. فاكرة لما جهزت مستشفي أطفال مصر وخليتها تعمل أضعاف العمليات للأطفال اللي كانوا بيموتوا وأقول عشان أطفال بلدي.. صرفت كل مليم معايا شخصيا علي الغلابة حسابي في البنك صفر وأقول عشان بلدي".
وتابعت ريهام سعيد: "كنت باقول لا دي مش بتمثل بنات مصر دي بتكدب برضوا عشان بلدي.. فشلت في حياتي الزوجية لأَنِّني ماكنتش بروح البيت.. نايمة في عربية بلف علي المستشفيات.. كان نفسي يكون عندي أطفال أكتر.. فضلت إني بفضل الله أحيي أطفال غيري".
واختتمت الإعلامية قائلة: "أول مرة أحس أني غلطانة في حق نفسي.. كنت فاهمة غلط.. كنت فاهمة أن اللي بيعمل صح ويقول الحق حتي لو علي رقبته بلده بتكرمه.. صعبان علي نفسي أوي منك يا مصر.. كل ده عشان مش مسنودة.. كنت فاكرة أني مسنودة بحبي ليكي وإخلاصي لشعبك.. أيوه معملتش علاقات ولا أتوددت لحد.. حبي للجيش والشرطة كان من القلب.. بجد تحيا مصر".
